Hattje van gold
Vaaierenhaalf uur vlaigen vanof Eelde. Vatteg joar leden, 1977, waren we hier veur eerste moal. n Schietdörpje mit n koppeltje aigenhaimers en 99% toeristen. Baargen rondom en playa aan zee. En deursnee tussen 25 en 35 groaden. Niksdoun was hier zowat ainegste optie.
Nou, 2017, bennen wie der weer. Baargen rondom en playa aan zee liggen der nog net zo. Ain verschil: ien vatteg joar tied is der n smak aan nijbaauw mit hotels en appetementen biebaauwd. Ain gigagrode widde tribune tegen baargen aanplakt, mit n gigamooie oetkiek op playa en zee. Niksdoun is hier nog aal zowat ainegste optie.
Vattien doagen niksdoun is ook nait alles. Den mor even Winzem.nijs kieken op mien IPad, blieven we n beetje op de hoogte. Dimitri en Suzan, zo lees ik, hollen der mit op: mit heur haile ziel en zoaleghaid hemmen ze rekloame moakt veur Boogplaain. Om te bekieken of r n trekker kommen wol, Jumbo bevobbeld. Nee dus. t Zit r nait ien, zeggen Dimitri en Suzan, en den holt t op. Nait aan dooie peerden trekken, heur ik ze zeggen. Geliek hemmen ze.
Gemaintebestuur denkter bliekboar aans over. Wetholler Harmannus Blok, n verstandeg bestuurder mit haart veur de zoak, zegt ien n eerste reakzie: ‘We gaan in volle vaart verder. Een alternatief scenario ligt nagenoeg klaar. Nietsdoen is geen optie’.
Ien vieftien joar tied ligt Boogplaain der nog net zo bie. Schoulplaain, niks meer, niks minner. Niks gain trekker, dij gemaintebestuur veur ogen haar en zo te heuren nog het. Trekkers bepoalen zulf woar ze zitten willen. Ien dij vieftien joar hemmen trekkers as AH en Aldi heur plek vonnen aan Onderndaamsterweg en Omsniedenskenoal. Veur grode bosschoppen huif je nait meer dörp ien. En is r anno 2017 ale roemte om Boogplaain en omgeven ienvullen te geven dij paast bie t dörpssentrum.
n Hattje van gold, dat is Boogplaain. Aan t Winzemerdaip mit Boog als overstap van wereldformoat tussen Winzem en Obergom. Zoas mien vekaanzie-adres ook n hattje van gold het: baargen en playa aan zee. En tribunes om der van te genieten. t Verwonnert mie niks dat ze gain trekker vienen kennen veur t Boogplaain. Hai is der al! Ik zai tribunes, maart, fietsekröss, bazaar, kienderspeulen, muziektempel, mobiele winkeltjes en goa zo mor deur. Spektoakel van jehelahola. Ien t hattje van gold. Doar komt n smak volk op of, wat ik joe brom.
Ligt hier n mooie nije klus veur Dimitri en Suzan om as Stichten Promootzie Winzem schollers onner te zetten? As Harmannus dat bedoult mit zien alternatief scenario, verdaint e wat mie betreft n standbeeld. Op Boogplaain!!!
Groeten aan joe almoal en Stronk ien t biezunder!
I-pit
