Zundagmirreg
Stoaregaan wordt t weer wat aangenoamer. Zel ook tied worren, end pril, den mag t ook wel. Zwembad is weer open, kiender goan weer op schoulraaiske, vv Winzem is vaaileg, FC Grunnen ook en het nog kaans op Europa en Feyenoord wordt aankom week kampioen.
Spanning is der oet en wie goan richten zummertied. Komkommertied mit flutnijs en op tillevizie niks as herhoalens. Column komt mie den nait aanwaaien.
Lekkere temperatuur, zun derbie en n stevige wiend: tied om even n endje te kuiern.
Bie Winkheem laans, deursteken noar Ripperda tou. Nait zoals aans boetenom, mor deur de stroaten hen, hoezen kieken. Ik ken de stroatnoamen wel vanzulf, Weverij, Leerlooierij, Zadelmakerij, Schans, Steenbakkerij, mor zo der dwaars deurhen ben ik r nog nooit west. En ik woon nogal wat joaren ien Winzem.
Den over Jeneverbrug en Oosterstroat ien. En der komt r ienains beeld bie. Rechts Tun Diekemoa, den fietseman Antjo, links t winkeltje van Van de Beld, even wieder vraauw Pol, kolenboer Van der Loan, Vizzer, winkel van Fred Bink en aan t end rechts vraauw Moedt.
Ripperda en Oosterstroat, wat n wereld van verschil veur n rasechte Winzemer as ik.
Old-Winzem: ken der nait allain n column over schrieven, ik ken der wel n bouk over schrieven. Titel heb ik al: zo was het vrouger ien Winzem.
I-pit
