Oeterste Holdboarhaids Doatum
Ons buurman Garbrand is joareg, koamer zit vol en ien keuken staait n stoantoavel mit asbakken.
Aan dij toavel staait n plougje mensen, dij over longen smoken en mit mond kwaalmen.
Kovviedrinken doun wie nait zegt Truus.
Truus is Garbrands vraauw, ze hebben kaander troffen op n ” deetzaaaid “ zoas Garbrand dat zo mooi zeggen kin.
Wichtje oet dôrp haar hom dr mit holpen en zo is t kloarkommen.
Ze kinnen t meroakel mit n kaander vienden en binnen stoapelwies mit mekoar.
Bie ons baaiden is holdboarhaid aal wel lwat verstreken zegt Garbrand voak, woarop Truus din steevast zegt: “ Mor ons onderdailen binnen nog goud bruukboar hur” woarop ze hoast ien boksem migt van t laggen.
Mor nait ofdwoalen ,gain kovvie dus.
Joa zegt Truus de ain wil slagroom of monsjoe, n aander vruchten of n riestevlaai van Jumbo, doar wil k nait mit zitten.
Doar komt bie dat Garbrand en ik nait zukse zuitbekken binnen dus t overschot kin k weggeven of vôtsmakken en dat begroot mie.
Rieks en Jaan baaiden mit n wat ongelukkege laifdesleven achter rug stoan te bier zoepen bie stoantoavel.
Ze proaten over voetballen, meziek en over lu dij vremd gingen ien dôrp.
Jaan drok en heveg sperend mit aarms over Berend Gruindiek en Anneke Tamsmoa [woar e zulm stiekun ook wel n oogje op had haar] en dat t leeftiedsverschil toch wel groot waas, aal waas t ook mor zeuven joar.
Anneke mit dij overjoarege dreugstoppel van n Berend, dat kon toch nait?
Anneke oetbundeg, altied midden ien wereld altied gugel mit elk en ain en mit n best bos holt veur deur, zee Rieks dreug, over vraauwlu mit n beste borstwering, woarop Jaan nog gekker ien hakken wuir.
Berend Gruindiek waas n allainstoande, wat n stille teruggetrokken toesterege man.
Boetendes kon t oeterlek hom nait zo veul schelen en zat e doarom dik ien t hoar en board.
Berend woonde op n spultje wat achterof , waas n handege jong en wat ogen zagen konden handen moaken.
Tinus Wever, grappenmoaker van dôrp haar Anneke noar Berend stuurt, hai zaag grap der wel van ien, haar Berend ook aal ais n moal n wild wief van n escortbureau stuurt, dij geliek weer rechtsomkeert moaken kon bie Berend.
Anneke haar n koperen deurbel woar klepel van broken waas , woarop Tinus zee: “Most even noar Berend goan dij moakt alles!”
Op n oavend is Anneke noar Berend goan, ze kwamen aan proat, stille Berend en Anneke dij n man trof dij luusteren kon.
Op t end van oavend wizzen ze baaiden van heur aigen klokje dat t mit t klepeltje wel goud zat.
Berend klunderde zainderogen op , t hoar schier op kop, board trimt en n fleske kleerasiel zôrgden der veur dat der n haile schiere kerel onder t harnas vôtkwam.
Der waren mor n poar ien t dorp dij der wat van te zeggen haren mor mainsten vonden t mooi veur dij baaiden.
Joop dij elk en ain veurzag van drinken laip mit lege bierfleskes noar krat en vulde zolle pindas en borrelneuten wat bie.
Dou ienains paniek ien de tent, bier waas op!
Hou liekt Stronk , hest doe nog n schaduwkratje ien schuur stoan, vroug Garbrand mie .
Geloof t wel zee ik, ik drink thoes nait veul bier.
Ien kolle tied heb ik laiver n berenburgertje of aans wat.
K Hoalde krat dij nog drijkwart vol waas oet schuur, k heb n monster buurman zee Garbrand laggend.
Dou ienains stem van Tinus: “Hee Stronk, t wuir ook wel tied dat t opkwam, volgende week is doatum verstreken.”
K Zaag op t fleske dat Tinus geliek haar, en van binnen waas k blied dat t nou tenminnend nog opdronken wuir.
Vraauwlu zaten ien houk aan toavel nog wat te proaten over t wicht van Smit dij verkeren haar mit jong van Theewis en Trien Vogel.
Ollu vonden t wel gou , al waren kiender nog wel wat aan jonge kaant.
Brechtje Willems dij ale nijskes van dorp wis, zee: “Ze hebbe mit heur baaiden oardeg ien kniep zeten t wicht waas drij week over tied , mor t is gelukkeg overbeterd.”
Ik docht woar je op n verjoardag t wel nait over proaten kinnen.
Garbrand en Truus hebben t over heur holdboarhaidsdoatum en laggen der over.
Berend Gruindiek waas overjoareg mor is strontgelukkeg mit zien Anneke.
Holdboarhaidsdoatum van ons bier waas aan krappe kaant mor smouk nog goud.
t Wicht van Smit waas overtied mor doarmit is t ook goud kommen.
De volgende môrn kom ik mit n holten hazzes van t nust of en zai dat Truus de overbliefselen van veurege oavend ien voelnisbak mieterd.
Garbrand lopt mit stoantoavel onder aarm noar schuur en zet t spul weer op stee.
Wat hebben we t hier toch goud, overdoadeg wordt overjoareg gnivvel ik ienwenneg.
Veur nijsberichten heur ik dat ien Amerikoa, veur datteg april nog aacht mensen n dodeleke injectie hebben mouten omdat aans….. de holdboarhaidsdoatum van t gif verstreken is.
k Heb n roar gevuil ien t lief en denk aan n pak yoghurt en aan n gedicht van n bekende Winzemmer dichter over n piep.
n Ondenkboare vergelieking……datteg april is west ,……….. pak yoghurt is der nog.
Gr. Stronk.
