Van ain op aander dag.
Loat op oavend zitten Stientje en ik op t terras van restoeraant op ons vekaanzieadres.
Stientje achter heur glaske rozè en ik achter n haalf kaan bier.
Wie proaten nog even nog over column van Stronk en ienains komt t hoge woord der oet.
Ze sloekt n paar moal net of ze n stukje pinda ien t verkeerd keelgat zitten het en zegt din ienains : Noa vekaanzie goa ik noar t gemaintehoes en loat mien noam veranderen.
Ik waas haildaal riddersloagen, joarenlaank waas t altied mien Stientje west en nou mos dat morzo veranderd worden?
k Vroug nog hail onneuzel wat veur noam ze nou hebben wol, mor dat wis ze nog nait recht, mor ze waas vastbesloten.
Ik bin vernuimd noar mie tante Stien en dat waas zòn k*twief, kon dat mens nait oetstoan, aal waas t nog zo.
En nou stoe Mien noam ook nog bruukst ien dien domme verhoaltjes, vuil ik mie net n Knelske oet Kees Visscher zien verhoaltjes,en over n noam van n kou nog mor te swiegen blèrde ze over t terras.
Mensen op terras keken mie meewoareg aan en dochten vast dat ik n helhoak van n wief haar, mor ze waas gewoon kwoad dij laiverd.
Dus zee ik tegen heur, rustig aan VZN,… dou waas de gort haildaal goar, denkst ook nog dast mie veur t zootje hollen kinst kounavvel dast bist.
Ik zee hail mietereg dat ik nait wist hou ze haitte en dat het veur mie ook wat nijs waas.
L
Noamsveranderen goh dud mie denken aan ons ol buurvraauw, waas nuimt noar opoe Jaantje, ze nuimde heur douJannie, wer dou ienains Joyce en wer op loater leeftijd weer Jannie.
Of mien vrougere buurwichtje Klaske, ging noar kibboets wer dekt deur n Israeli , traauwde en hait nou Karin.
Of ien t streekje woar ik vrouger woonde waas n jong haitte Roel laait hom ombaauwen tot vraauw en hait nou Sandra, woarbie mien dochter Sandra op heur beurt weer duuvels om waas.
Mor ja lu Stientje is Stientje nait meer, k heb gevuil dat k vreemd goa, overspel pleeg, ze zee ienains doar op t terras tussen aal dij mensen , nuim mie ien t vervolg mor Ine.
Huh Ine? woar ik op rekend haar mor Ine waas nooit ien mie opkommen.
Ik wol grappig wezen en ik docht, din loat ik mien noam veranderen ien Hero mor heb het wiezelek mor nait zegt.
Stel joe veur Hero en Ine dat waas wat west.
Dou wie op bèr gingen sloug ik dekens open en zee: kom der mor Ine en t rezultoat waas, wel beeld mor gain geluud.
k Heb haile naacht gain oog dichtdoan, nait meer durven te zeggen goa ais aan kaant Ine, of kiek n Mercedes benz ine.
Mor t kin nog minder docht ik want wat waas t geval, vraauw (hè dat schrift makkelder) en ik zaten dus op t terras en ik heb de zaaikte om noar aander mensen te kieken , zoals zai ook noar ons zitten te kieken vanzulf.
Schuun tegenover ons zat n stel woarbie de man der hail normoal oetzaag ,mor dij vraauw haar n kop as n mopshond woarbie neus en ogen bie de verkoop ien ain pries te kriegen waas, k docht ook dat ze zunnebril nog op haar mor t waren heur neusgoaten.
t Mensje kon der niks aan doen vanzulf, ze het heurzulf ook nait moakt mout je mor reken, mor der waas wel n mor bie.
Ze keek of ze de haile hazzes vol snòt zitten haar, echt zòn snòtkoker en ze haar de hazzes vol snòt zitten ……
en dat mos der oet.
Vol verwachting keek ik noar de veurstellen, papieren buusdoukje kwam der bie en heur man draaide hom aal om. Dij wis wat der kommen ging vanzulf.
Ik docht dat kin wat worden en t wèr ook wat lu nait te geloven.
t Doukje wer openvold, kwam om neusvleugeltjes tou en ze begon te snuuten en ze bleef snuuten, ik docht doar komt wel n kuub snòt oet.
Dou dee ze t buusdoukje open en…. der zat volgens mie niks ien , viel dat even tegen en dat vond ze zulf bliekboar ook.
Dus begon ze nog n moal mor dizze raaks waas t gain snuuten mor ik laig nait ze begon te tetteren , te tetteren zodat elk en ain omkeek of der n koppel oafrikoanse olifanten oet t oerwoud lòsbroken waren.
Dou ze t resultoat bekeken haar en nou tevreden over de opbrengst waas, mos t neuske noawreven worden joe waiten wel n beetje snif snif.
Mor dit waas gain snif snif , de haile tissjoe wèr compleet ien de ” veurhoofdholtes” propt net as n kòrketrekker en zo kwam t er ook weer oet.
Ik docht , din kin je toch beter n vraauw hebben dij nukken het en heur noam veranderen wil , as dat je mit zòn kerremisattractie op pad mouten.
n Dag loater kwam vraauw van bèr en ik wol net vroagen wolst echte botter op stoet of margar.ine, dou zee mien laiverd, nuim mie mor weer gewoon zoals ik echt hait en dat is ook gain Stien zoals n bult van joe meschain nou aal wel deur hebben.
Ik smeer n stoetje mit sjem, ondertied heur ik ien de verte t getetter van de vraauw van gusteroavend weer ……… k heb der dizze raais gelukkeg gain beeld bie.
Gr. Stronk
