Column: Stronk (6)

Foto: WinsumNieuws

Marijke

k Maag hailtied groag noar minsen kieken.
Ien Herestroat ien Stad of veur Piet Vriezemoa zien Partybar ien Oethoezen .
En ook bie de Golden Kaarper ien Winzem waas t altied n mooi gezicht om noar minsen te kieken.

Zummers vraauwlu ien luchtige klaaidjes en kerels mit n drijkwart boksems aan.
s Winters ien dikke jazzen en kroagen tot strót tou dicht.
Ze zagen mie ook wel zitten en onder t motto: kin dat aalmoal zo, laipen ze din weer wieder of mouken n proatje.

Zo zaag je ien Stad Piet van Dieken wel ais lopen.
Ien Oethoezen stook Harry Houk mit zien prairiehoud ver boven minsen oet .
Zaag je ien Winzem voak onze Roel , dij voelnispuut van visboer Jackob dichtslingerde.
Ook de notabelen van t dórp laipen der wel ais laangs , summege zeden goidag en aander haaren t hoog ien de hazzes en deden net of je lucht veur heur waren.
Aarme minsen binnen dat.

Sums zaag je wel ais wichtjes woar je vrouger wel ais mit scharreld
haaren en dat je joe nait veurstellen konnen dat je doar gek op west waren.
Aansom dochten zai t zulfde over mie denk ik , k kin toch nait best over miezulf zeggen dat ik zulf zo goud opdreugd bin.

Dou zaag ik ien de verte n stoet mit hoge mieters aan kommen lopen.
k Heurde krougholder prummelen over n stel opvreters.
Over peerd getilde ambtenoaren dij normoal gesproken Boers,mor nou ienains ien gezelschop hounderkefraans prouten ,nou ja t is mij ook om t lijk.

……………En dou ienains zaag ik …Marijke.

Marijke n aanhangster van AFZEE Twente
Mit heur gruin mantelpakje en rood brilje.
Marijke is der veur de gewone man en de demente.
En ien road nait te beroerd om te vroagen hé wat wil je?

Op n degelk onderstelje en stief vol zin.
Holt ze gemaainte gezond, ja wis.
Begunt te piepen, as ze t nait goud zain kin.
En denkt dat ze kop en kont van Eemsmond is.

Ze is n mini coopertje mit KEMA keur.
n Appelsienje mit n pókkel vol pitten.
Ik zit op terras en ik knik vol verwachten noar heur.
Verbeel die mor niks slaaif, ze zigt die toch nait zitten.

En onnertied ik n potje bier bestel bie krougholder.
Zai ik om mie tou, mooie deurleefde verweerde koppen.
Ze geven mie waarmte en k bin der wies mit.
En hail…hail ien de verte zai ik nog n glimp van Marijke.
Dij tien joar burgemeester is en opvaalt………..deur nait biezunder te wezen.

Stronk

Cookieinstellingen