Wat is nou grof ?
Dou mien kammeroad I pit mie vroug of ik der wat veur vuilde om n collumn te schrieven docht ik, zol k dat nog wel kinnen? n Poar doag loater kreeg ik n tillefoontje van Cees vd Meent ( veul van heurt mor nooit zain ), en dij vroug mie of ik op n vrijdagmirreg ien t HvW kommen wol. Ik docht dat zel t Hof van Winzem wel wezen, aal haar k der nooit van heurt. I pit vertelde mie dat t op t aanleg waas en vertelde mie woar ik precies wezen mos.
Dou ik op lokoatie aankwam zaag ik z.g t Hof van Winzem , je konden beter zeggen t Hol van Winzem. k Vuilde mie ien t hol van de beer, lutje beerke Ard ( babybeer ) schoevelde doar wat rond en lait mie zien verblief zain. Der laipen ook nog wat onbekende pazzipanten rond, woar ik nait ain van kon. Pabbe Beer Cees kwam wat loater zee Ard,omreden dij nog even bie dokter laangs mos. Noast n jong dij achter n kopschraaberijkkaast zat en ain of aander jongerenwaarker laip der nog n vremde droktemoaker rond.
Hai leek verdocht veul op Woefdram oet foabeltjeskraant,hai haitte Merckx ,ik docht nog, din bin ik Zoetemelk zeker. Hevig speerend en bril ien n toesternust van hoar, prout e net zo rap as zien noamgenoot fietste. As n machinegeweer dij op kledder waas, vuurde hai staccato vroagen op ons of. We moeten zus en we moeten zo, k vuilde mie aal onzekerder worden en waas blied dat I pit op n duur ook binnen kwam. Cees komt even loater en vroagt of ik alvast begunnen wil zee Ard , waarop hai Cees en worst begon te snieden, en zol pinda’s en borrelneuten op toavel zette, n beter begun kon hoast nait docht ik.
Woefdram nam t woord en vroug omduur as n rezerzjeur dij n crimineel ondervragt aan mie: en ……..wat doe jij hier? Ik piepte, dat het de bedouling waas dat ik n verhoaltje zol schrieven , waarover blafte hai woarop ik piepte dat ik dat nait wis. k Docht goa nou gaauw weg, ik wait voak nooit woar k t over hebben gai, joa mainstied vief menuten veurtied pas. Dou ienains tillefoon Cees mos noar t zaikenhoes en haar meschain wel longembolieèn ,nait best docht ik ,omreden ik dat zulf ook had haar.
Tien menuten loater wer t duuster ie t hok, Pabbe Beer kwam binnen. Cees ien aigen persoon, potdorie zòn grode embolie haar ik nog nooit zain. Hai zee veurdat ik noar t zaikenhoes gai, wil ik Stronk eerst nog even haand schudden. Ik docht gnivvelend: eerst Stronk zain en din staarven zeker.
Dou e mie haand schudt haar en ik mienend gelukkeg nog haar, nam e ofschaid. Loater zaag ik n foto mit doarop n ofbeelden van Cees mit n slang ien neusgoaten en dat t gelukkeg goud ging.I pit zee dat Cees ais tegen hom zegt haar dat hai wat schaarper schrieven mos, woarop I pit zegt haar: ik schrief wat ik schrief en doar most mor mit doun. Ja en dou kwamen ze bie mie oet, wat grof net bie t raandje laangs n gegeven woar ik haile tied nooit wat van begrepen heb, en mie ook wel dwaars zeten hèt.
Dat begon dou ik stukjes ien Ommelaander kraant schreef over n boer dij ien group meeg. n Boerin vroug mie hest doe dat schreven Stronk, mooi man, mien Pa zee t is net of k zulf weer op staal staai. Komt er op hoge poten n klacht bie Ommelaander binnen ,ondertaikend Drs. A.J Bolt oet Amsterdam ducht mie. Perbaaieren wie t Grunnegs n beetje fesounlek te hollen, publiceren joe dit …schandelek schreef e. Mos ik din schrieven dat boer woaterde ien group? Din denken mensen toch dat boer mit n fles woater boven group ston haar,nee lu hai ..meeg mit n dikke stroal ,en nait oet n fles.
Ik bin nait cultureel, verbeel mie niks en schrief ien toal van t volk ….dè ! Ook op toneel soamen mit kammeroad I pit kreeg ik dat verwiet ook voak ais. Din zeden ze, nou Stronk waas weer net bie t raandje laangs hè ? Twij tellen loater zeden dezulfde lu, hest Youp nog zain op tillevisie mooi hè ? Nait ien Winzem hur,doar snappen ze mie wel, mor ik snapte der zulf net niks van.
Nee,Youp zol nooit zingen dat de Mamme van Michel topless ien toene laag. En dat e nait wis wat e zaag, Jan Henk de Groot wis om de dooie dood wel wat e zaag aans zol t toch n lul wezen. Dat mens laag doar gewoon mit blode titten! doar huif je toch nait zo onneuzel om te doun. Youp van t Hek joa dij zol zingen over n lesbo oet Lellens mit n kunstlul aan liene. Dat Jan Henk op dij leeftijd din nait snapte, joa doar kin k nog wel ienkommen.
Nee der is n bult volk dij Youp van t Hek mooi vienden, ik ook. As e mit kerstdoagen over dat knien zingt, vien ik dat ook mooi. Ook is der volk dij mie grof vienden, dat vien ik nait. As n boerin zegt dat heur stafolle olheer t gevuil haar dat e weer op staal ston te miegen , ja lu …doar gaait mie t om….t gevuil.
Gr. Stronk.
