Column: Kiek-over-diek (14)

Foto: WinsumNieuws

Stemmen

Wie hemmen t nog nooit zo stoer had: woar mout je ien vredesnoam 15 meert op stemmen? As je dat nou nog nait waiten, stoan joe te bouk as ‘zwevende kiezer’.

Stemwiezer ienvullen? Ik ken niks mit dij vroagen, vul of en tou mor wat ien om der of te wezen en krieg mien verdainde straf: 1. SGP, 2. CU en 3. PVV.

Nee dus. Ien kraant stonnen de punten van ale petijen op n rieg: almoal mooi en oareg, ken der gain wies oet.

Debatten volgen? Van petij dij mie meschain wel wat liekt, staait mie de kop van de veurman nait aan. Wordt ook stoer.

As t om voetballen gaait, ben ik nait zo’n zwever. Echte fan ben ik nou ook weer nait, mor as ik oet de 18 ien eredivisie kaizen mout, stem ik op ons FC.

Mooi dichtbie, je kennen r zo noar tou, en de FC heurt bie Grunnen en denkt om Grunnen.

t Is n nedde en moderne klup en Nijland is al joaren betraauwboar boegbeeld. En -dat is wat weerd!- as r rebulie ien de tent is, draaider zien kont r nait veur weg.

Der bennen disraais 28 smoaken, van de overbekende petijen tot aan ‘DENK’, ‘Piratenpartij’ en ‘JEZUS LEEFT’ aan tou.

‘DENK’ wordt m veur mie denk ik nait. En de veurmannen van dij leste twij vertraauw ik nait: d’ aine het vast n lap veur t oog en veurman van d’aander hait Joop.

Mor n petij dij trekken het van FC Grunnen: doar kom ik wel oet! Joe den?

I-Pit

Reacties